၂၀၂၅ မေလ ၃၀ ရက်
(သျှမ်းသံတော်ဆင့်၊ ဖယ်ဒရယ် FM၊ The Red Flag)
ရှမ်းပြည်နယ်တောင်းပိုင်း ပင်လောင်းမြို့နယ် ဆောင်းပြောင်းကျေးရွာအတွင်းရှိ ဒေသခံနေအိမ် အများအပြားကို KNDF၊ PNDF နှင့် PDF တို့က မီးရှို့ဖျက်ဆီးခဲ့ကြောင်း ရုပ်သံဖိုင်တစ်ခုနှင့်အတူ ဝါဒဖြန့်ချိနေပါသည်။
စစ်ကောင်စီဝါဒဖြန့် ချန်နယ်တစ်ခုဖြစ်သော Myanmar National Post မှ မေလ ၂၉ ရက်နေ့တွင် ရေးသားဖော်ပြခဲ့ပြီး နေအိမ်မီးလောင်နေသည့် ရုပ်သံဖိုင်များနှင့်အတူ ဖြန့်ချိခဲ့သည်။
၎င်းက”ယမန်နေ့ (မေလ ၂၇ ရက်)က ပင်လောင်းမြို့နယ် ဆောင်းပြောင်းရွာမှာရှိတဲ့ KNDF၊ PNDF၊ PDF အကြမ်းဖက်သောင်းကျန်းသူတွေကို မောင်းထုတ်နိုင်ခဲ့ပြီလို့ ပအိုဝ်းပြည်သူ့စစ်တပ်ဖွဲ့က သတင်းထုတ်ပြန်ခဲ့ပါတယ်။ အကြမ်းဖက်သမားများဟာ ဆုတ်ခွာထွက်ပြေးစဉ်မှာ ဆောင်းပြောင်းရွာအတွင်းက ဒေသခံပြည်သူများရဲ့ နေအိမ်အမြောက်အများကို မီးရှို့ဖျက်ဆီးသွားခဲ့ကြတဲ့ ရုပ်သံထွက်ပေါ်လာခဲ့ပါတယ်” ဟု (မူရင်းအတိုင်း) ရေးသားဖြန့်ချိခဲ့သည်။
ထိုဝါဒဖြန့်ချိသည့် သတင်းကို ကြည့်ရှုသူပေါင်း ၁၆၀၀ ကျော်ရှိပြီး အခြားစစ်ကောင်စီ ဝါဒဖြန့်ချန်နယ်များကလည်း ထပ်ဆင့်ဖော်ပြထားသည်ကို တွေ့ရသည်။
မူရင်းလင့်ခ် – https://archive.ph/Lokr3
Snow Queen – https://archive.ph/JX0zp
အဆိုပါပျံ့နှံ့လာသော ရုပ်သံဖိုင်ကို MFCN အဖွဲ့ဝင် သျှမ်းသံတော်ဆင့်နှင့် ဖယ်ဒရယ် FM တို့၏ အချက်အလက် စစ်ဆေးသူများက ပူးပေါင်းပြီး FIRMS Tools ဖြင့် စစ်ဆေးကြည့်သည့်အခါ မေလ ၂၇ ရက်နေ့တွင် ပင်လောင်းမြို့နယ် ဆောင်းပြောင်းကျေးရွာရှိ နေအိမ်များမီးရှို့ခံထားရကြောင်း ဖော်ပြထားခြင်း မတွေ့ရပေ။
စစ်ဆေးတွေ့ရှိချက်
ပင်လောင်းမြို့နယ် ဆောင်းပြောင်းကျေးရွာအနီးတွင် စစ်ကောင်စီတပ်၊ ပအိုဝ်းပြည်သူ့စစ် PNO နှင့် ကရင်နီတော်လှန်ရေးပူးပေါင်းတပ်ဖွဲ့တို့အကြား တိုက်ပွဲများ မေလ ၂၇ ရက်နေ့အထိ ဆက်လက်ဖြစ်ပွားနေကြောင်း သျှမ်းသံတော်ဆင့်သတင်းဌာနက ဖော်ပြထားသည်။
သျှမ်းသံတော်ဆင့် – https://shorturl.at/ckCuo
ဆောင်းပြောင်းရွာ အနောက်ဘက် ဘုရားတောင်ခြေ၌ တပ်စွဲထားသည့် စစ်ကောင်စီတပ်နှင့် ပအိုဝ်းပြည်သူ့စစ် PNO ပူးပေါင်းအဖွဲ့ကို ကရင်နီအမျိုးသားကာကွယ်ရေး KNDF၊ ပြည်သူ့ကာကွယ်ရေး PDF ပူးပေါင်းအဖွဲ့တို့က မေလ ၁၇ ရက်နေ့ နံနက်အစောပိုင်းက ဝင်ရောက်တိုက်ခိုက်ရာမှ တိုက်ပွဲစတင်ခဲ့ခြင်း ဖြစ်သည်။
ထို့ပြင် ဆောင်ပြောင်းကျေးရွာအနီးရှိ ပင်လောင်း-ဆောင်းပြောင်းလမ်းမကြီးအပါအဝင် စစ်ကောင်စီနှင့် PNO စခန်းကုန်းအချို့ကို တော်လှန်ရေးတပ်ဖွဲ့များက ထိန်းချုပ်သိမ်းပိုက်ထားနိုင်ပြီဖြစ်ကြောင်း စစ်ရေးသတင်းအရင်းအမြစ်ကို ကိုးကား၍ Karenni People’s Voice က မေလ ၂၈ ရက်နေ့တွင် ဖော်ပြထားသည်။
Karenni People’s Voice – https://shorturl.at/3dY0S
အဆိုပါ တိုက်ပွဲများအတွင်း စစ်ကောင်စီဘက်က လက်နက်ကြီး၊ လေယာဉ်အပြင် အဆိပ်ငွေ့ဗုံးများ အများဆုံး အသုံးပြုကာ ခုခံနေပြီး ဖယ်ခုံအခြေစိုက် ခမရ (၃၃၆) မှ လက်နက်ကြီးဖြင့် ပစ်ကူပေးနေကြောင်း Karenni People’s Voice က ဖော်ပြထားသည်။
လက်ရှိ ဆောင်းပြောင်းကျေးရွာ ဒေသခံအများစုသည် ရွာလုံးကျွတ် ထွက်ပြေးတိမ်းရှောင်နေရပြီး ကျေးရွာအတွင်းရှိ နေအိမ်များကို စစ်ကောင်စီတပ်နှင့် ပြည်သူ့စစ် PNO တို့က လူနေအိမ်တွေကို မီးရှို့ဖျက်ဆီးနေကြောင်း ကန္တာရဝတီတိုင်း(မ်) သတင်းတွင်လည်း ဖော်ပြထားသည်။
ကန္တာရဝတီတိုင်း(မ်) – https://shorturl.at/DBWzX
“KNDF၊ PDF အပြင်တခြားတခြားသော တော်လှန်ရေး တပ်ဖွဲ့တွေက စစ်စခန်းကလွဲရင် ကျန်တာ မီးရှို့လေ့ မရှိကြပါဘူး။ ဆောင်းပြောင်းမီးလောင်ရတာဟာ စကစရဲ့ လက်နက်ကြီးနဲ့ လေယာဉ်၊ ဒရုန်းတွေကြောင့်ပါ” ဟု ရှေ့တန်းစစ်မြေပြင်သို့ရောက်ရှိနေသည့် KNDF တပ်ဖွဲ့ဝင်တစ်ဦးက ဖက်ဒရယ် FM သို့ ပြောသည်။
သုံးသပ်ချက်
လက်ရှိအချိန်ထိ ပင်းလောင်းမြို့နယ် ဆောင်းပြောင်းကျေးရွာအနီးတဝိုက်တွင် စစ်ကောင်စီတပ်၊ ပအိုဝ်းပြည်သူ့စစ် PNO နှင့် ကရင်နီတော်လှန်ရေးပူးပေါင်းတပ်ဖွဲ့တို့အကြား တိုက်ပွဲဆက်လက် ဖြစ်ပွားနေလျက်ရှိသည်။
ဆောင်းပြောင်းကျေးရွာအတွင်းရှိ ဒေသခံနေအိမ်အများအပြား မီးရှို့ခံနေကြောင်း သတင်းသိရသော်လည်း မည်သည့် လက်နက်ကိုင်အဖွဲ့အစည်းများက မီးရှို့သွားကြောင်း
သီးခြားအတည်ပြုရန် ခက်ခဲနေဆဲပင် ဖြစ်သည်။
သို့သော်လည်း တိုက်ပွဲဖြစ်ပြီးတိုင်း စစ်ကောင်စီတပ်သည် ကျေးရွာတွေကို မီးရှို့ဖျက်ဆီးပြီး အခြားသော လက်နက်ကိုင်အဖွဲ့အစည်းအပေါ် လွှဲချမှုများရှိခဲ့ကြောင်းကိုလည်း အချက်အလက် စစ်ဆေးထားမှုများလည်း ရှိသည်။
လင့်ခ် – https://shorturl.at/aDp5b
စစ်ကောင်စီတပ်သည် တိုက်ပွဲဖြစ်ပွားနေသည့် နယ်မြေဒေသအတွင်း ကျေးရွာများ၊ နေအိမ်များအား မီးရှို့လေ့ရှိသည်။ မီးရှို့မှုနှင့်ပတ်သက်၍ စစ်ကောင်စီတပ်က အမြဲတစေ ငြင်းဆန်ခဲ့သော်လည်း ယခုအချိန်တွင် စစ်ကောင်စီအတွက် ငြင်းမရသည့် သက်သေများ ပေါ်ထွက်လာပြီဖြစ်ကြောင်း Myanmar Now ဆောင်းပါး တစ်ပုဒ်တွင် ဖော်ပြထားပါသည်။
စစ်ကောင်စီတပ်၏ နယ်လှည့်မီးရှို့မှုများအတွက် သက်သေဖြစ်လာသည့် ရုပ်သံဖိုင်များ – https://shorturl.at/o0wIV
စာဖတ်ပရိတ်သတ်များအနေဖြင့်လည်း လူမှုကွန်ရက်စာမျက်နှာများပေါ်၌ ပျံ့နှံ့လာသော အကြောင်းအရာများကို ချက်ချင်းမယုံကြည်ဘဲ လွပ်လပ်သည့် သတင်းဌာနများ၊ ယုံကြည်စိတ်ချရသော သတင်းအချက်အလက် စစ်ဆေးသည့် အဖွဲ့အစည်းများတွင် သွားရောက်ကြည့်ရှုမေးမြန်းရန် တိုက်တွန်းလိုပါသည်။
