မြန်မာပြည်ကို မုန်တိုင်းလာနေတယ်ဆိုတာ တကယ်မှန်ရဲ့လား

ဧရာဝတီ၊ ရန်ကုန်၊ မန္တလေး၊ မွန်နဲ့ ကရင် စတဲ့ တိုင်းနဲ့ပြည်နယ်တွေကို မုန်တိုင်းလာနေပြီဆိုတဲ့ ဖော်ပြချက်တစ်ခု လူမှုကွန်ရက်မှာ ပျံ့နှံ့နေပါတယ်။

“မုန်တိုင်းလာနေပြီ
ဧရာဝတီကို အဓိကထားလာမည်
ရန်ကုန်၊ မန္တလေး၊ မွန်၊ ကရင် အဖျားခပ်မည် တဲ့
အားလုံးသတိထားကြပါ” လို့ ရေးသားဖော်ပြဖြန့်ချိနေတာပါ။

Follower ပြုလုပ်ထားသူ လေးသိန်းကျော်ရှိတဲ့ “သုတလစုံလင် ” နာမည်နဲ့ လူမှုကွန်ရက်စာမျက်နှာက ဖော်ပြထားတာဖြစ်ပြီး Reaction ပြုလုပ်ထားသူ နှစ်ထောင်ကျော်နဲ့ ပြန်လည်မျှဝေထားသူ ကိုးထောင်ကျော်ရှိပါတယ်။ ဒီလင့်မှာ ကြည့်နိုင်ပါတယ်။

အဲဒီဖော်ပြချက်ကို Myanmar Factchecking Network အဖွဲ့ဝင် Dawei Watch က အချက်အလက်ပြန်လည် စိစစ်ဖော်ပြလိုက်ပါတယ်။

ယှဥ်တွဲဖော်ပြထားတဲ့ ပုံကို စိစစ်ချက်

အထက်ဖော်ပြပါ လူမှုကွန်ရက်စာမျက်နှာ မုန်တိုင်းလာနေပြီဆိုတဲ့ ဖော်ပြချက်နဲ့ ယှဥ်တွဲဖော်ပြထားတဲ့ ဓာတ်ပုံကို စိစစ်ကြည့်ရာ မိုးလေဝသလေ့လာသုံးသပ်သူ ဦးဝင်းနိုင်ရဲ့ မိုးလေဝသခန့်မှန်းချက်တစ်ခုမှာ အသုံးပြုထားတဲ့ ဓာတ်ပုံကို ယူသုံးထားတော တွေ့ရပါတယ်။

ဦးဝင်းနိုင် ဖော်ပြထားတဲ့ မိုးလေဝသခန့်မှန်းချက်မှာ ထိုင်းမိုးလေဝသဌာနရဲ့ ဧပြီလ ၁ရက် ထုတ်ပြန်ချက်ကို ကိုးကားပြီး မတ်လ ၃၁ ရက်ကနေ ဧပြီ ၃ ရက်အတွင်း ထိုင်းပင်လယ်ကွေ့တောင်ပိုင်းမှ ကပ္ပလီပင်လယ်ဘက်ကို မိုးများနိုင်တဲ့ အခြေအနေနဲ့ ဧပြီလ ၂ ရက်မှ ၃ ရက်အတွင်း ကပ္ပလီပင်လယ်တောင်ပိုင်းမှာ လေဖိအားနည်းရပ်ဝန်းဖြစ်လာမှာကို စောင့်ကြည့်ကြရမယ့် အခြေအနေတွေကို ဖော်ပြထားတာဖြစ်ပါတယ်။

အဲဒီဖော်ပြချက်မှာ လေဖိအားနည်းရပ်ဝန်းဖြစ်လာပြီးမှ အားဘယ်လောက်အထိ ကောင်းလာမယ်၊ ဘယ်ဘက်ကို ဦးတည်ရွေ့လျားမယ်၊ အရွယ်အစားက ဘယ်လောက်ကြီးနိုင်မယ်ဆိုတာတွေ နောက်တစ်ဆင့်စောင့်ကြည့်ရမယ့် အခြေအနေဖြစ်ပြီး ရွေ့လျားဝင်ရောက်လာမယ့် လမ်းကြောင်းသေချာပြီဆိုမှ နောက်ဆက်တွဲ မိုးများနိုင်မယ့် ဒေသတွေကို ဆက်ပြီး ပြောလို့ရမယ်လို့ ဦးဝင်းနိုင်က ပြောဆိုထားပါတယ်။

မြန်မာပြည်ကို မုန်တိုင်း ဝင်လာနေပြီလို့ ပြောကြားဖော်ပြထားခြင်းမျိုး မရှိတာကို တွေ့ရပါတယ်။

ဦးဝင်းနိုင် ၏ မူရင်း post လင့် –

လေဖိအားနည်းရပ်ဝန်း၊ မုန်တိုင်းဖြစ်လာနိုင်ခြေရှိတဲ့ အခြေအနေ ခန့်မှန်းချက်

ECMWF Cyclone Genesis Chart မိုးလေဝသ ခန့်မှန်းမှာ ကပ္ပလီပင်လယ်နဲ့ ဘင်္ဂလားပင်လယ်အော်အတွင်း ဧပြီလ ၃ရက် ကနေ စတင် လေဖိအားနည်းရပ်ဝန်းဖြစ်ပေါ်ပြီး မုန်တိုင်းအဆင့်သို့ရောက်ရှိနိုင်ချေ ၄၀ ရာခိုင်နှုန်း၊ ဧပြီ ၄ ရက်နဲ့ ၅ ရက် တွေမှာ မုန်တိုင်းအဆင့်ကို ရောက်ရှိနိုင်ခြေ ၆၀ရာခိုင်နှုန်းရှိတဲ့အကြောင်းဖော်ပြတယ်လို့ ဦးဝင်းနိုင်က ရေးသားထားပါတယ်။

လတ်တလောရရှိထားတဲ့ ကြိုတင်ခန့်မှန်းချက်တွေအရ မြန်မာနိုင်ငံဘက်ကို ဦးတည်သည်ဖြစ်စေ၊ ဦးတည်ရွေ့လျားခြင်း မရှိသည်ဖြစ်စေ လမ်းကြောင်းညာဘက်မှာရှိနေတဲ့ မြန်မာနိုင်ငံအနေနဲ့ လေဖိအားနည်းရပ်ဝန်းအရှိန်သက်ရောက်မှုကို ခံရမှာဖြစ်တယ်လို့ ဆိုပါတယ်။

အဲဒီ သက်ရောက်မှုကြောင့် မြစ်ဝကျွန်းပေါ်ကမ်းရိုးတန်း၊ ရခိုင်ကမ်းရိုးတန်း၊ ဧရာဝတီတိုင်းနဲ့ ရန်ကုန်တိုင်းအပြင် ပဲခူးတိုင်းအနောက်ခြမ်းဒေသတွေမှာပါ လေ/မိုး/လှိုင်း အသင့်အတင့်ကနေ ပြင်းထန်နိုင်တဲ့ အခြေအနေတွေ ဖြစ်ပေါ်နိုင်တယ်လို့ ဦးဝင်းနိုင်က ဧပြီလ ၁ရက်က ခန့်မှန်းထားပါတယ်။

လေဖိအားနည်းရပ်ဝန်း(သို့မဟုတ်)မုန်တိုင်းရယ်လို့ ဖြစ်လာသေးတာမဟုတ်ဘဲ ကြိုတင်ခန့်မှန်းချက်မှာသာရှိနေဆဲသာ ဖြစ်ကြောင်းလည်း သူက ပြောပါတယ်။ ဦးဝင်းရဲ့ ရေးသားပြချက်ကို ဒီလင့်မှာ ကြည့်နိုင်ပါတယ်။

ဧပြီလ ၄ ရက်မှာ အားပျော့သော လေဖိအားနည်းရပ်ဝန်းအဆင့် ဖြစ်လာနိုင်ပြီး ဧပြီလ ၆ ရက်မှာ ဘင်္ဂလားပင်လယ်အော်နဲ့ ကပ္ပလီပင်လယ်အတွင်း လေဖိအားနည်းရပ်ဝန်းဖြစ်နိုင်ချေ ၄၀ ရာခိုင်နှုန်းအထိ လျော့ကျလာသွားမှာကို တွေ့ရတယ်လို့ ဦးဝင်းနိုင်က ဒီနေ့ ဧပြီလ ၂ရက် မနက်မှာ ထပ်မံခန်းမှန့် ဖော်ပြထားပါတယ် ။ ဒီလင့်မှာ ကြည့်နိုင်ပါတယ်။

အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ် စီမံခန့်ခွဲရေးဝန်ကြီးဌာနရဲ့ ဧပြီလ ၆ ရက်အထိ မိုးလေဝသ ခန့်မှန်းချက်မှာလည်း ဧပြီ ၄ ရက်ကနေ ၆ ရက်အတွင်း လေဖိအားနည်းရပ်ဝန်းဖြစ်ပေါ်ပြီး မြန်မာနိုင်ငံအနှံ့အပြား မိုးထစ်ချုန်းရွာနိုင်တယ်လို့ ခန့်မှန်းထားပါတယ်။ ဒီလင့်မှာ ကြည့်နိုင်ပါတယ်။

စစ်ကောင်စီလက်အောက်ရှိ မိုးလေဝသ နှင့် ဇလဗေဒ ညွှန်ကြားမှု ဦးစီးဌာန ကလည်း မုန်တိုင်းနဲ့ ပတ်သက်ပြီး ဖော်ပြချက်တစ်စုံတစ်ရာ မဖော်ပြသေးတာ တွေ့ရပါတယ်။

ဒါကြောင့် မြန်မာပြည်ကို မုန်တိုင်း လာနေပြီဆိုတဲ့ ဖော်ပြချက်ဟာ လက်တလော အတည်ပြုစိစစ်ချက်များအရ အတည်ပြုထားတဲ့ အချက်အလက်ဖော်ပြချက် မရှိသေးတာကို စိစစ်တွေ့ရှိရပါတယ်။

အကြံပြုချက်

ယခု နွေကာလ ဧပြီနဲ့ မေလတွေမှာ နေ့အပူချိန်မြင့်တက်မှုကြောင့် အပူပျံရာမှ မွန်းလွဲပိုင်းနဲ့ ညနေပိုင်းတွေမှာ လေပြင်း တိုက်ခတ်တာ၊ နေရာကွက်ကြားမိုးထစ်ချုန်းရွာတာ၊ လျှပ်စီးလက်တာ၊ မိုးကြိုးပစ်တာတွေ ကြုံရနိုင်ပြီး ရေကြောင်း နဲ့ လေကြောင်းသွားလာရေးအသုံးပြုသူတွေ အထူးဂရုပြုဖို့မိုးဇလက သတိပေးထားပါတယ် ။ ဒီလင့်မှာ ကြည့်နိုင်ပါတယ်။

သုံးသပ်ချက်

ကပ္ပလီပင်လယ်ပြင်နဲ့ ဘင်္ဂလားပင်လယ်အော်မှာ ဧပြီလ ၃ ရက်ကနေ ၆ ရက်အတွင်း လေဖိအားနည်းရပ်ဝန်းဖြစ်ပေါ်မယ်လို့ မိုးလေဝသဌာနတွေနဲ့ မိုးလေဝသ လေ့လာသုံးသပ်သူတွေက ခန့်မှန်းထုတ်ပြန်ထားကြပါတယ်။ ဒါပေမဲ့ မြန်မာနိုင်ငံကို မုန်တိုင်းလာနေပြီလို့ ခန့်မှန်းဖော်ပြကြတာတော့ မတွေ့ရှိရသေးပါဘူး။

လေဖိအားနည်းရပ်ဝန်းရဲ့ မြန်မာနိုင်ငံအပေါ် သက်ရောက်မှုအနေနဲ့လည်း စောင့်ကြည့်နေဆဲ အခြေအနေမှာပဲ ရှိသေးတယ်လို့ မိုးလေဝသ လေ့လာသုံးသပ်သူတွေက သုံးသပ်ကြပါတယ်။ မတိကျမသေချာသေးတဲ့ အချက်အလက်တွေနဲ့ မုန်တိုင်းလာနေပြီလို့ ဖြန့်ဝေတာဟာ ငလျင်ဘေးဒဏ်ကိုအပြင်းအထန်ခံနေရတဲ့ ပြည်သူလူထုကို စိုးရိမ်သောက ပိုမိုမြင့်တက်စေနိုင်တဲ့အတွက် အချက်အလက် စိစစ်ဖော်ပြရခြင်းဖြစ်ပါတယ်။

မိုးလေဝသနဲ့ ပတ်သက်ပြီး ယုံကြည်ရတဲ့ မိုးလေဝသဌာနဲ့ လေ့လာသုံးသပ်သူတွေရဲ့ ခန့်မှန်းချက်တွေကိုသာ စောင့်ကြည့် မျှဝေကြဖို့ တိုက်တွန်းလိုပါတယ်။

ယုံကြည်သင့်တဲ့ မိုးလေဝသသတင်းရင်းမြစ်တွေ အောက်တွင်ဖော်ပြပေးထားပါမယ် ။

NUG မိုးဇလ သတင်းတွေတင်ဆက်နေတဲ့ MOHADM page link –

စစ်ကောင်စီ လက်အောက်ရှိ မိုးလေဝသ နှင့် ဇလဗေဒ ညွှန်ကြားမှု ဦးစီးဌာန page link –

မိုးလေဝသ လေ့လာသုံးသပ်သူ ဦးဝင်းနိုင်၏ လူမှုကွန်ယက် –

အချက်အလက်စိစစ်ဖို့ တောင်းဆိုနိုင်ပါတယ်

စာဖတ်သူတွေအနေနဲ့ ငလျင်ဘေး၊ မိုးလေဝသအခြေအနေ အပါအဝင် သတင်းတု၊ သတင်းအမှားတွေ၊ စစ်ဆေးပေးစေလိုတဲ့ သံသယဖြစ်ဖွယ် သတင်းအချက်အလက်တွေ ရှိလာရင်ဖြစ်ဖြစ်၊ မှန်ကန်တဲ့သတင်း ဟုတ် မဟုတ်အတည်ပြု မေးမြန်းလိုရင်ပဲဖြစ်ဖြစ် Myanmar Fact Checking Network နဲ့ Myanmar Fact Checking Network အဖွဲ့ဝင်ဖြစ်တဲ့ Dawei Watch ရဲ့ မက်ဆင်ဂျာကနေတစ်ဆင့် ဆက်သွယ်ပြီး အချက်အလက်စစ်ဆေးပေးဖို့ အကူအညီတောင်းနိုင်ပါတယ်။