ငလျင်ဘေးနဲ့ ပတ်သက်ပြီး ငိုနေတဲ့တရုတ်ကယ်ဆယ်ရေးသမားရုပ်သံဟောင်းကို အသုံးပြုပြီး ဖြန့်ဝေနေတဲ့သတင်းမှား
၂၀၂၅ခုနှစ်၊ ဧပြီလ၊ ၂ရက်။
(Fact Check) DNA/ The Red Flag
မြန်မာနိုင်ငံအတွင်း အပြင်းစားငလျင်ဝင်ရောက်မှုအပြီးမှာ တရုတ်နိုင်ငံကနေလာရောက် ကယ်ဆယ်တဲ့ကယ်ဆယ်ရေးသမားတဦးက Sky Villa ကယ်ဆယ်ရေးမှာ ကလေးတယောက်ကိုပဲကယ်ဆယ်နိုင်ခဲ့ပြီး တခြားသူတွေကိုမကယ်နိုင်လို့ ငိုကြွေးနေတယ်ဆိုတဲ့ ရုပ်သံတခုလူမှုကွန်ရက်မှာ ပျံ့နှံ့နေပါတယ်။
အဲ့ဒီရုပ်သံကို MIni Film Myanmar ဆိုတဲ့ လူမှုစာမျက်နှာကနေ စတင်ဖြန့်ဝေထားပြီး လူစိတ်ဝင်စားမှုအားကောင်းနေကာ Hay Mar Cho ဆိုတဲ့အကောင့်မှာလည်း “အထဲမှာ လူတွေအများကြီး ပိတ်မိနေတာ သူ့အနေနဲ့ ကလေးတစ်ယောက်ပဲ ကယ်ထုတ် နိူင်ခဲ့လို့ ဝမ်းနည်းလို့ငိုနေတာတဲ့” ဆိုတဲ့ (မူရင်းအတိုင်း) ဖြန့်ဝေထားကာ ပြန်လည်မျှဝေသူများပြားနေပြီး ပျံ့နှံ့မှုအားကောင်းနေပါတယ်။
သတင်းမှား လင့်များ
– https://ghostarchive.org/archive/HUKPU
– https://ghostarchive.org/archive/Wmz6H
ငိုနေတဲ့ကယ်ဆယ်ရေးအမျိုးသားရဲ့ ရုပ်သံကို MFCN အဖွဲ့ဝင်ဖြစ်တဲ့ DNA Fact Check အဖွဲ့ကနေ စစ်ဆေးကြည့်တဲ့အခါမှာ လွန်ခဲ့တဲ့၅နှစ်က ရုပ်သံဟောင်းဖြစ်တာကိုတွေ့ရှိရပြီး လက်ရှိဖြစ်နေတဲ့ ရုပ်သံတွေကိုပေါင်းထည့်ပြီး ဖြတ်ညှပ်ကတ်လုပ်ထားတဲ့ သတင်းမှားဖြစ်ကြောင်း အတည်ပြုနိုင်ခဲ့ပါတယ်။
သတင်းစိစစ်ချက် ☑️
တရုတ်နိုင်ငံ ကျန်းရှီးပြည်နယ်၊ ဖိန်ရှန်းမြို့မှာ ၂၀၁၉ခုနှစ်၊ ဇူလိုင်လ ၇ရက်နေ့မှာ မိုးသည်းထန်စွာရွာသွန်းတာကြောင့် ရေကြီးခဲ့ပြီး ရုပ်သံမှာပါဝင်တဲ့ ကယ်ဆယ်ရေးအမျိုးသား လျှောက်ရှီးဂျီး က ၁၄နာရီကြာ ကယ်ဆယ်ရေးမှာပါဝင်ခဲ့ပြီး ကလေးတဦးကိုကယ်ဆယ်နိုင်ခဲ့ကာ တခြား မကယ်ဆယ်နိုင်သေးတဲ့ သူတွေရှိနေသေးတာကြောင့် ငိုကြွေးနေတာဖြစ်တယ်ဆိုတာကို China Youth Network ကရေးသားထားပါတယ်။
China Youth Network – https://www.thepaper.cn/newsDetail_forward_4048135
အဲ့ဒီကယ်ဆယ်ရေးအမျိုးသားက ကလေးငယ်ကိုကယ်တင်ပြီးတဲ့အချိန်မှာ တကိုယ်လုံးစိုရွှဲနေပြီး မနက်စာလည်းမစားရသေးဘဲ အရမ်းပင်ပန်းနေတာကြောင့် မြေကြီးပေါ်ထိုင်ပြီး ငိုနေခဲ့တာဖြစ်တယ်လို့လည်း China Youth Daily သတင်းဌာနကဖော်ပြထားပါတယ်။
China Youth Daily – https://www.sport.gov.cn/n4/n264/n15345/c21011125/content.html
၂၀၁၉ခုနှစ်က တရုတ်နိုင်ငံမှာ မိုးကြီးပြီး လူသေဆုံးမှု တရာကျော်ရှိခဲ့တယ်ဆိုတာကိုလည်း DVB သတင်းဌာနကလည်း သတင်းရေးသားဖော်ပြခဲ့ပါသေးတယ်။
DVB – https://www.facebook.com/share/p/15rdGfi2ud/
သုံးသပ်ချက် ☑️
ငိုနေတဲ့ ကယ်ဆယ်ရေးသမားရဲ့ဖြစ်ရပ်က လွန်ခဲ့တဲ့ ၅ နှစ်က တရုတ်နိုင်ငံမှာဖြစ်ခဲ့တဲ့ ဖြစ်ရပ်ဖြစ်ကြောင်း အတည်ပြုနိုင်ခဲ့ပါတယ်။
ငလျင်ဘေးနဲ့ပတ်သက်ပြီး ရုပ်သံဟောင်းကို ပြန်လည်အသုံးပြုပြီး Sky Villa မှာကလေးတယောက်ကိုပဲကယ်နိုင်လို့ငိုနေတာဖြစ်တယ်လို့ ပုံမှားရိုက်ကာ လက်ရှိကယ်ဆယ်ရေး ရုပ်သံတွေကို ရောနောပြီး အကြောင်းအရာမှားတွေကိုဖြန့်ဝေနေတာပါ။
ဒါကြောင့် ဒီကနေ့ခေတ်ဟာ ဆိုရှယ်မီဒီယာခေတ်ဖြစ်တဲ့အတွက် အဲဒီဆိုရှယ်မီဒီယာတွေပေါ်မှာ အကြောင်းအရာ တခုခုကို ပုံဖျက်ဖို့၊ ဝါဒဖြန့်ဖို့၊ ကိုယ်ကျိုးရှာဖို့ ရည်ရွယ်ပြီး သတင်းအတု၊ သတင်းအမှားတွေကို ရည်ရွယ် ချက်ရှိရှိ ဖြန့်ဝေနေကြတာကြောင့် အလွယ်တကူ မယုံကြည်ဖို့၊ ပြန်ပြီး မမျှဝေကြဖို့ အကြံပြုလိုပါတယ်။
စာဖတ်သူတွေအနေနဲ့ သတင်းတု/သတင်းမှား ဖြစ်တယ်လို့ သံသယရှိရင်ပဲဖြစ်ဖြစ်၊ မှန်ကန်တဲ့သတင်း ဟုတ်၊ မဟုတ်အတည်ပြု မေးမြန်းလိုရင်ပဲဖြစ်ဖြစ်၊ Fact Checking ပြုလုပ်ပေးတဲ့ သတင်းဌာန/အဖွဲ့ အစည်းတွေရဲ့ Chat Box ကနေ သွားရောက်မေးမြန်းကြဖို့ တိုက်တွန်းလိုပါတယ်။
Myanmar Fact-checking Network အဖွဲ့ဝင်ဖြစ်တဲ့ DNA Fact Check အဖွဲ့ကိုလည်း Facebook page ကနေဆက်သွယ်မေးမြန်းနိုင်သလို ဒီနေရာ (dnafactcheck @gmail.com)ကနေ လည်း ဆက်သွယ်မေးမြန်းပြီး အချက်အလက်စစ်ဆေးပေးဖို့ တောင်းဆိုနိုင်ပါတယ်။
Myanmar Fact-checking Network အဖွဲ့ဝင်တွေ အချက်အလက်စစ်ဆေးထားတဲ့ သတင်းတွေကို ဒီနေရာမှာ ဝင်ရောက်ဖတ်ရှုနိုင်ပါတယ်။
Myanmar Fact-checking Network အဖွဲ့ဝင်တွေ အချက်အလက်စစ်ဆေးထားတဲ့ သတင်းတွေကို ဒီနေရာမှာ ဝင်ရောက်ဖတ်ရှုနိုင်ပါတယ်။
Web – https://myanmarfactcheckingnetwork.org/
Fb – https://www.facebook.com/myanmarfactcheckingnetwork
