(Fact Check) Delta News Agency/ MPA / MFCN / The Red Flag
ရခိုင်ပြည်နဲ့ မကွေးတိုင်းအစပ် အမ်း-ပဒါန်းလမ်းပေါ်က နတ်ရေကန်ဗျူဟာစခန်းကို လာတိုက်ပြီး ဆုတ်ခွာ ထွက်ပြေးနေရတဲ့ အေအေ က ဒုဗိုလ်အဆင့် ဝင်းနေစိုးနဲ့အဖွဲ့ကို ပြည်သူတွေက ဝိုင်းဝန်းဖမ်းဆီးခဲ့ပြီး ၎င်းတို့ ဒေသအတွင်း အကြမ်းဖက်မှုများ မလုပ်ကြရန် မှာကြားနေတယ်ဆိုပြီး ပုံတစ်ပုံနဲ့အတူ ရေးသားထားမှု ပျံ့နှံ့ နေတာကို တွေ့ရပါတယ်။
ဒီအကြောင်းအရာကို စစ်ကောင်စီလော်ဘီ Kyaw Swar တယ်လီဂရန်ချန်နယ်ကနေ မတ် ၂၃ ရက်မှာ “အမ်း -ပဒမ်းလမ်း နတ်ရေကန်စခန်းကိုတိုက်ခိုက်ပြီး ဆုတ်ခွာထွက်ပြေးနေရသော AA ဒုဗိုလ်အဆင့် ဝင်းနေစိုး နှင့် အဖွဲ့ကို ပြည်သူများက ဝိုင်းဝန်းဖမ်းဆီးခဲ့ပြီး ၎င်းတို့ ဒေသအတွင်း အကြမ်းဖက်မှုများ မလုပ်ဆောင်ကြရန် မှာကြားနေပုံ”(မူရင်း)လို့ရေးသားပြီး ပုံ ၁ ပုံနဲ့အတူ ရေးသားဖြန့်ဝေခဲ့တာကို တွေ့ရပါတယ်။
Kyaw Swar-https://archive.ph/KGtEf
အဲဒီအကြောင်းအရာကို ကြည့်ရှုသူ ၃၃,၀၀၀ ကျော်၊ Like and React ပေးသူ ၈၇၀ကျော်၊ မျှဝေသူ ၂၀ ကျော်နဲ့ မှတ်ချက်ပေးသူ ၅၀ကျော်ရှိပြီး ပျံ့နှံမှုများနေတာကို တွေ့ရပါတယ်။
ဒါ့အပြင် အခြားလော်ဘီချန်နယ်တွေဖြစ်တဲ့ SittNgweOo , Sit Min , ပြည်သတင်းမှန် စတဲ့ တယ်လီဂရန် ချန်နယ်တွေကပါ ထပ်ဆင့်ရေးသားဖြန့်ဝေခဲ့တာကို တွေ့ရပါတယ်။
Sit min- https://archive.ph/Uqldb
SittNwayOo- https://archive.ph/lKCCq
ပြည်သတင်းမှန်- https://archive.ph/ZweQp
စစ်ကောင်စီလော်ဘီမီဒီယာဖြစ်တဲ့ PAN Page မှာ “မတ်လ ၂၁ ည ၈ နာရီခွဲမှာ မကွေးမြို့နယ်၊ အင်းနက် ကျေးရွာဘုန်းကြီးကျောင်းကို လူ ၂ ဦး ရေဝင်သောက်လို့ ကျေးရွာသားတွေက ဝိုင်းဝန်းဖမ်းဆီးရာ ကျောက် တော်မြို့နယ်၊ ရွာဟောင်းကျေးရွာအခြေစိုက် အမှတ်(၉၂၈) AA တပ်ရင်းက ဖြိုးထက်ဦးကို ဖမ်းမိပြီး AA ဒုဗိုလ်အဆင့် ဝင်းနေစိုး လွတ်မြောက်သွားလို့ ရှာဖွေနေတယ်”လို့ ရေးသားထားတာကို တွေ့ရပါတယ်။
PAN- https://archive.ph/jE2gE
အဲဒီသတင်းနဲ့ပတ်သက်လို့ Myanmar Fact-checking Network အဖွဲ့ဝင်ဖြစ်တဲ့ Delta News Agency နဲ့ MPA က စစ်ဆေးကြည့်တဲ့အခါ ပြည်သူ့ကာကွယ်ရေးတပ်မတော် (မန္တလေး)က တပ်ဖွဲ့ဝင်တွေဟာ ပြည်သူတွေကို လေကြောင်းရန် ကာကွယ်ရေးအသိပညာပေးသရုပ်ပြတဲ့ပွဲလုပ်ထားတဲ့ပုံတွေထဲက ၁ ပုံကို သုံးပြီး လုပ်ကြံ ဖန်တီးရေးသားထားတဲ့ သတင်းမှားဆိုတာကို စိစစ်သိရှိရပါတယ်။
☑️ သတင်းစိစစ်ချက်
မတ်လ ၂၀ ရက်မှာ “ပြည်သူ့ကာကွယ်ရေးတပ်မတော် (မန္တလေး)နဲ့ အာဏာရှင်စနစ်ဆန့်ကျင်ရေး ပြည်သူ့ အင်အားများ ချိတ်ဆက်ညှိနှိုင်းရေးကော်မတီ(AFCC-Mdy)တို့ပူးပေါင်းပြီး ထိန်းချုပ်စိုးမိုးနယ်မြေတွေမှာ လူထုတွေ့ဆုံပွဲနဲ့ လေကြောင်းရန်ကာကွယ်ရေးနဲ့ပတ်သက်တဲ့ သတင်းအချက်အလက်တွေကို ဝေမျှခြင်းနဲ့ လက်တွေ့သရုပ်ပြမှုတွေကို လုပ်ခဲ့တယ်”လို့ ပြည်သူ့ကာကွယ်ရေးတပ်မတော် (မန္တလေး)က ထုတ်ပြန်ထား တာကို ဖတ်ရှုနိုင်ပါတယ်။
ပြည်သူ့ကာကွယ်ရေးတပ်မတော် (မန္တလေး)- https://bitly.cx/D0x3
“မန္တလေးပြည်သူ့ကာကွယ်ရေးတပ်မတော်(MDY PDF)နဲ့ အာဏာရှင်စနစ်ဆန့်ကျင်ရေး ပြည်သူ့အင်အား များ ချိတ်ဆက်ညှိနှိုင်းရေးကော်မတီ(AFCC-Mdy)တို့က ပူးပေါင်းပြီး MDY PDF ထိန်းချုပ်နယ်မြေမှာ လူထုတွေ့ဆုံပွဲနဲ့ လေကြောင်းရန်ကာကွယ်ရေးအသိပညာမျှဝေပွဲ ပြုလုပ်ခဲ့တယ်”လို့ PVTV ကရေးသား ထားတာကို တွေ့ရပါတယ်။
PVTV -https://bitly.cx/2xcgA
အလားတူ “MDY PDF ထိန်းချုပ်နယ်မြေမှာ လူထုတွေ့ဆုံပွဲနဲ့ လေကြောင်းရန်ကာကွယ်ရေးအသိပညာ ပေးသရုပ်ပြပွဲတွေ ပြုလုပ်ခဲ့တယ်”လို့ Voice of Mandalay- PDF ကရေးသားထားတာကို ဖတ်ရှုနိုင် ပါတယ်။
Voice of Mandalay- PDF – https://bitly.cx/wASx7
☑️သုံးသပ်ချက်
စစ်ကောင်စီကနိုင်ငံအနှံ့အပြားမှာ ပြည်သူကိုဦးတည်တဲ့ လေကြောင်းတိုက်ခိုက်မှုတွေ အဆက်မပြတ် ပြုလုပ်နေလို့ ပြည်သူတွေအနေနဲ့ လေကြောင်းရန် ကာကွယ်ရေးနဲ့ပတ်သက်တဲ့ သတင်းအချက်အလက် တွေကိုသိရှိဖို့နဲ့ ဘယ်လိုကာကွယ်ရမယ်ဆိုတာကို သရုပ်ပြနေတဲ့ ပုံတွေထဲက တစ်ပုံကိုအသုံးပြုပြီး လုပ်ကြံ ဖန်တီးရေးသားထားတဲ့ သတင်းမှားဖြစ်တာကို တွေ့ရှိရပါတယ်။
မတ် ၂၁ ရက်က မကွေးမြို့နယ်၊ အင်းနက်ကျေးရွာဘုန်းကြီးကျောင်းမှာ ရေဝင်သောက်တဲ့လူ ၂ ဦးကို ရွာသား တွေက ဖမ်းဆီးရာ အမှတ်(၉၂၈) AA တပ်ရင်းက ဖြိုးထက်ဦးကို ဖမ်းမိပြီး AA ဒုဗိုလ်အဆင့် ဝင်းနေစိုး လွတ်မြောက်သွားလို့ ရှာဖွေနေတယ်လို့ လော်ဘီ PAN က ရေးသားထားတာကို တွေ့ရပါတယ်။
ဒါပေမဲ့ မတ် ၂၃ ရက်မှာ AA ဒုဗိုလ်အဆင့် ဝင်းနေစိုးနဲ့အဖွဲ့ကို ပြည်သူတွေက ဝိုင်းဝန်းဖမ်းဆီးခဲ့ပြီး ၎င်းတို့ ဒေသအတွင်း အကြမ်းဖက်မှုများ မလုပ်ဆောင်ကြရန် မှာကြားခဲ့တယ်လို့ Kyaw Swar ကရေးသားခဲ့ပေမဲ့ SittNgweOo နဲ့ပြည်သတင်းမှန်က ဝိုင်းဝန်းဖမ်းဆီးခဲ့လို့ရေးသားကာ Sit Min က ဝိုင်းဝန်းဖမ်းဆီး သုတ် သင်ခဲ့တယ်ဆိုပြီး အမျိုးမျိုးလုပ်ကြံဖန်တီးရေးသားခဲ့တာဖြစ်တယ်ဆိုတာကို တွေ့ရှိရပါတယ်။
ဒီကနေ့ခေတ်ဟာ ဆိုရှယ်မီဒီယာခေတ်ဖြစ်တဲ့အတွက် အဲဒီဆိုရှယ်မီဒီယာတွေပေါ်မှာ အကြောင်းအရာ တခုခုကို ပုံဖျက်ဖို့၊ ဝါဒဖြန့်ဖို့၊ ကိုယ်ကျိုးရှာဖို့ ရည်ရွယ်ပြီး သတင်းအတု၊ သတင်းအမှားတွေကို ရည်ရွယ် ချက်ရှိရှိ ဖြန့်ဝေနေကြတာကြောင့် အလွယ်တကူ မယုံကြည်ဖို့၊ ပြန်ပြီး မမျှဝေကြဖို့ အကြံပြုလိုပါတယ်။
စာဖတ်သူတွေအနေနဲ့သတင်းတု/သတင်းမှားဖြစ်တယ်လို့ သံသယရှိရင်ပဲဖြစ်ဖြစ်၊ မှန်ကန်တဲ့သတင်း ဟုတ်၊ မဟုတ်အတည်ပြု မေးမြန်းလိုရင်ပဲဖြစ်ဖြစ်၊ Fact Checking ပြုလုပ်ပေးတဲ့ သတင်းဌာန/အဖွဲ့အစည်း တွေရဲ့ Chat Box ကနေ သွားရောက်မေးမြန်းကြဖို့ တိုက်တွန်းလိုပါတယ်။
Myanmar Fact-checking Network အဖွဲ့ဝင်တွေ အချက်အလက်စစ်ဆေးထားတဲ့ သတင်းတွေကို ဒီနေရာမှာ ဝင်ရောက်ဖတ်ရှုနိုင်ပါတယ်။
Web – https://myanmarfactcheckingnetwork.org/
Fb – https://www.facebook.com/myanmarfactcheckingnetwork
