၂၀၂၄ ဒီဇင်ဘာလ ၇ ရက်, သျှမ်းသံတော်ဆင့်၊ The Red Flag
ရုပ်သံဖိုင်အဟောင်းကိုအသုံးပြုပြီး တအာင်း (ပလောင်) အမျိုးသားလွတ်မြောက်ရေး တပ်မတော် TNLA မှ ခေါင်းဆောင်ပိုင်းတစ်ဦး သေဆုံးသွားသကဲ့သို့ ရေးသား၍ Tik Tok ရုပ်သံဖိုင်တစ်ခုကို ဖြန့်ချိနေပါသည်။
စစ်ကောင်စီအာပေး တယ်လီဂရမ်ဝါဒဖြန့်ချန်နယ်လ်တစ်ခုဖြစ်သည့် U Kyaw Soe Oo ချန်နယ်လ်မှ ဒီဇင်ဘာလ ၄ ရက်နေ့တွင် ဖြန့်ချိခဲ့ပြီး “တင်နီလာအေး ခေါင်းကြီးပိုင်းမုသွားပြီ” ဟု (မူရင်းအတိုင်း) ရေးသားဖြန့်ချိခဲ့သည်။
ထိုသတင်းအမှားကို ကြည့်ရှုသူပေါင်း ၄၃,၀၀၀ ကျော်ရှိပြီး U Kyaw Soe Oo ချန်နယ်လ်အပြင် အခြားသော စစ်ကောင်စီအာပေး တယ်လီဂရမ်ဝါဒဖြန့်ချန်နယ်လ်များကလည်း ဖြန့်ချိထားသည်။
မူရင်းလင့်ခ် – https://archive.md/6cfo1
ဆက်စပ်သတင်းအမှားလင့်ခ် – https://archive.ph/8jJe1
သတင်းအမှားဖြန့်ချိသူတွေ ဖော်ပြသည့် အကြောင်းအရာကို Myanmar Fact-checking Network အဖွဲ့ဝင် သျှမ်းသံတော်ဆင့် အချက်အလက်စစ်ဆေးသူများက တိုက်ဆိုင်စစ်ဆေးခြင်း ပြုလုပ်ခဲ့သည်။ ထိုအကြောင်းအရာသည် မှားယွင်းနေသည်။
သတင်း စစ်ဆေးတွေ့ရှိချက်
ရုပ်သံဖိုင်တွင်ပါရှိသော TNLA ခေါင်းဆောင်ပိုင်းတစ်ဦးသည် ပြီးခဲ့သည့် ၂၀၂၃ နိုဝင်ဘာလ ၂၈ ရက်တွင် ရောဂါနှင့် လွတ်မြောက်နယ်မြေ၌ ကွယ်လွန်သွားခဲ့ကြောင်း ရွှေဖီမြေသတင်းတစ်ပုဒ်တွင် ဖော်ပြသည်။
ထိုခေါင်းဆောင်ပိုင်းတစ်ဦးသည် တအာင်း (ပလောင်) အမျိုးသားလွတ်မြောက်ရေး တပ်မတော် TNLA ၏ စီးပွားရေးဌာနမှ ဌာနမှူး ဗိုလ်မှူးတားဆငည်းဇား (ခေါ်) မိုင်းနိုင်သန်းထွန်းဖြစ်ပြီး၊ လွန်ခဲ့သည့် ၂၀၁၂ ခုနှစ်ကတည်းက ၂၀၂၂ ခုနှစ်အထိ စစ်ဦးစီးချုပ်ရုံးတွင် တာဝန်ထမ်းဆောင်ခဲ့ကြောင်း ရွှေဖီမြေသတင်းက ဖော်ပြသည်။
ထို့အပြင် ၂၀၂၂ ခုနှစ်မှ ၂၀၂၃ ခုနှစ်အထိ တအာင်း (ပလောင်) အမျိုးသားလွတ်မြောက်ရေး တပ်မတော် TNLA ၏ ဗဟိုကော်မတီအဖွဲ့အဖြစ် တာဝန်ထမ်းဆောင်ခဲ့ပြီး၊ ၂၀၂၂ ခုနှစ်မှ ကွယ်လွန်သွားခဲ့သည့်အချိန်ထိ စီးပွားရေး ဌာနမှူးတာဝန်ကို ထမ်းဆောင်ခဲ့ကြောင်းဆိုသည်။
မူရင်းလင့်ခ် –https://archive.ph/pLMUY
ဆက်စပ်ဖတ်ရှု့ရန် – https://archive.ph/20wz0
ကွယ်လွန်သွားသည့် ဗိုလ်မှူး တားဆငည်းဇား (ခေါ်) မိုင်းနိုင်သန်းထွန်း၏ စျာပနအခမ်းအနားကို လွတ်မြောက်နယ်မြေတစ်နေရာတွင် ၂၀၂၃ နိုဝင်ဘာ ၂၉ ရက်နေ့၌ ကျင်းပပြုလုပ်ခဲ့ကြောင်း TNLA ကလည်း ထုတ်ပြန်ထားသည်။
ထုတ်ပြန်ချက် – https://t.me/taangtv2023/597
၂၀၂၄ ဒီဇင်ဘာလ ၂ ရက်နေ့တွင် ဖော်ပြသော မဇ္စျိမသတင်းဌာနတွင်လည်း “TNLA ခေါင်းဆောင်ပိုင်းတွေ တိုက်ပွဲအတွင်း သေဆုံးသယောင် ဖြန့်ဝေနေတဲ့ သတင်းအမှား”ဆိုပြီး ဖော်ပြထားသည်။
မဇ္စျိမ – https://bur.mizzima.com/2023/12/02/8348
သုံးသပ်ချက်
TNLA ၏ စီးပွားရေးဌာနမှူး ဗိုလ်မှူးတားဆငည်းဇား (ခေါ်) မိုင်းနိုင်သန်းထွန်း ကွယ်လွန်သွားကြောင်း မှန်ကန်သည်။ သို့သော် ကွယ်လွန်သွားအချိန်သည် ယခုရက်ပိုင်းအတွင်း မဟုတ်ဘဲ ပြီးခဲ့သည် ၂၀၂၃ နိုဝင်ဘာလ ၂၈ ရက်နေ့က ကွယ်လွန်သွားခြင်းဖြစ်သည်။
သတင်းအမှားဖြန့်ချိသူတွေက ရုပ်သံဖိုင်အဟောင်းအသုံးပြုပြီး ယခုရက်ပိုင်းအတွင်းမှ TNLA ခေါင်းဆောင်ပိုင်း တစ်ဦးကွယ်လွန်သွားသယောင် ရေးသားကာ ဝါဒဖြန့်ချိနေခြင်း ဖြစ်သည်။
သတင်းတု၊ သတင်းမှားဟု ယူဆရသည့် သတင်းတွေကိုလည်း Myanmar Fact-checking Network Facebook Chat Box မှဆစ်ဆင့် သတင်း၏ လင့်ခ် (သို့မဟုတ်) Screenshot ပုံပေးပို့ခြင်းဖြင့် စစ်ဆေးနိုင်ပါသည်။
Myanmar Fact-checking Network အဖွဲ့ဝင်များ၏ အချက်အလက်စစ်ဆေးထားသည့် သတင်းများကိုလည်း ဤနေရာတွင် ဝင်ရောက်ဖတ်ရှုနိုင်ပါသည်။
